Բարսելոնան պարզել է շարունակվող վնասվածքների պատճառը
Բարսելոնան և Հանսի Ֆլիկը հայտնվել են բարդ իրավիճակում, որը կարող է վտանգի տակ դնել թիմի ամբողջ մրցաշրջանը։ Թիմի ղեկը ստանձնելուց հետո գերմանացի մասնագետը դեռևս չի ունեցել հնարավորություն խաղադաշտ դուրս բերել ամբողջությամբ առողջ կազմ։
Ամենամեծ հարվածը այն է, որ կրկին նույն առանցքային ֆուտբոլիստներն են դուրս մնացել շարքից՝ Ռաֆինյան, Լամին Յամալը, Ռոբերտ Լևանդովսկին, Դանի Օլմոն և այժմ նաև Պեդրին։
Ինչպես հաղորդում է Mundo Deportivo-ն, Բարսելոնայի ղեկավարությունը և մարզչական շտաբը վերջերս ներքին հանդիպում են անցկացրել՝ հասկանալու թիմում վնասվածքների պատճառները։ Քննարկման արդյունքը միանշանակ է եղել․ հիմնական պատճառը գերծանրաբեռնված օրացույցն է։
Թեև թիմը նախորդ մրցաշրջանում ևս ունեցել է նման գրաֆիկ, այս անգամ ֆուտբոլիստները ֆիզիկապես ավելի հոգնած են, բայց նույնիսկ ռոտացիայի անհրաժեշտության գիտակցումը չի օգնել կանխել վնասվածքները։ Խիտ հանդիպումները, տարբեր ծանրաբեռնվածությունները հավաքականներում և մարզումների բաշխման դժվարությունները համարվում են հիմնական գործոններ։
Վերջին նորությունները
Ռոտացիայի փակ շրջափուլը
Ֆլիկն ու իր թիմը հայտնվել են «կործանարար շրջապտույտի» մեջ․ նրանք պարտավոր են ռոտացիա իրականացնել՝ վնասվածքներից խուսափելու համար, բայց միաժամանակ ստիպված են նույն խաղացողներին օգտագործել, քանի որ վնասվածքների պատճառով այլընտրանք չկա։
Բացի այդ, Բարսելոնայի նման ակումբում յուրաքանչյուր հանդիպում հաղթելու ճնշումը թույլ չի տալիս մարզչին ազատ որոշումներ կայացնել կազմի փոփոխությունների հարցում՝ դրանով էլ ավելի խորացնելով խնդիրը։
Վերջին օրերին դրական լուրեր են գրանցվել․ Ժոան Գարսիան, Ռոբերտ Լևանդովսկին և Դանի Օլմոն մոտ են վերադարձին։ Սակայն դրան զուգահեռ Պեդրին դուրս է մնացել մեկ ամսով, Ռաֆինյան նոր վնասվածք է ստացել, իսկ Լամին Յամալը դեռևս 100 տոկոսով պատրաստ չէ խաղադաշտ վերադառնալուն։
Այս ամենը կրկին վտանգում է թիմի կայունությունը, իսկ Հանսի Ֆլիկի և իր շտաբի առջև դրված խնդիրները մնում են նույնը՝ գտնել լուծում Բարսելոնայի շարունակվող վնասվածքային ճգնաժամին։
