Բարսելոնայում իրարանցում է
Վնասվածքները շարունակում են մնալ Հանսի Ֆլիկի Բարսելոնայի գլխավոր խնդիրը այս մրցաշրջանում՝ խափանելով թիմի առաջընթացը կարևոր պահերին։ Այս պահի դրությամբ ակումբի վնասվածք ստացած ֆուտբոլիստների ցանկը հասել է արդեն տասներեքի։ Վերջինն այս ցուցակում Պեդրին է, ով ստիպված է բաց թողնել առնվազն մեկ ամիս։
COPE-ի հաղորդմամբ՝ ակումբի ներսում նկատվում է որոշակի անհամաձայնություն և իրարանցում բժշկական անձնակազմի և ֆիզիոթերապևտների միջև։ Այս ներքին լարվածությունը հանգեցնում է շփոթության և հակասական հաղորդագրությունների խաղացողների պատրաստ լինելու վերաբերյալ։
Ակնառու օրինակ դարձավ Ֆեռան Տոռեսի դեպքը՝ Չեմպիոնների լիգայի Օլիմպիականոսի դեմ խաղից առաջ։ Թեև Հանսի Ֆլիկը մամուլի ասուլիսում հրապարակայնորեն հայտարարել էր, որ ֆուտբոլիստը չի կարող մասնակցել հանդիպմանը, ի վերջո Տոռեսը անակնկալ կերպով հայտնվեց պահեստայինների նստարանին։ Ըստ աղբյուրի՝ այս վերջին րոպեի փոփոխությունը կատարվել էր ֆիզպատրաստության մարզիչների խորհրդով, որոնք գերակա էին համարել իրենց գնահատականը բժշկական եզրակացության նկատմամբ։
Նման մտահոգիչ միտումը առկա է նաև Լամին Յամալի դեպքում։ 18-ամյա ֆուտբոլիստը դեռևս լիարժեք չի ապաքինվել և, ինչպես նշվում է, ինտենսիվ մարզումներից հետո երեկոյան շարունակում է զգալ թեթև անհարմարություն։ Ակումբը, ըստ տեղեկությունների, արդեն դիմել է արտաքին խորհրդատվության՝ Յամալի վերականգնման գործընթացը առավել արդյունավետ կառավարելու նպատակով։ Ֆուտբոլիստը մշտական կապի մեջ է բժշկական անձնակազմի հետ։ Թեև բժիշկները բացառել են վիրահատության տարբերակը, նրանք պնդել են, որ Յամալը պետք է ավելի հետևողական լինի իր ամենօրյա վարժությունների և նշանակված ծրագրի պահպանման հարցում։
Վերջին նորությունները
Ինչ վերաբերում է Պեդրիին՝ նրա վնասվածքը Ֆլիկը բնութագրել է «անսպասելի»։ Գերմանացի մասնագետը նշել է, որ նախնական տեղեկությամբ ֆուտբոլիստը միայն «թեթև անհարմարություն» էր զգում։ Սակայն հետագայում պարզվել է, որ խնդիրը ավելի լուրջ բնույթ է կրել։
Հիմնական խաղացողների անորոշ վիճակի և ներքին անհամաձայնությունների պայմաններում այս անջատումը դառնում է Բարսելոնայի համար լուրջ մարտահրավեր, որը ակումբը պետք է անհապաղ լուծի։
