Ի՞նչ է սպասվում Էրիկ Գարսիային 25/26 մրցաշրջանում
Էրիկ Գարսիան Բարսելոնայի կազմում մասնակցեց նոր մրցաշրջանի առաջին նախամրցաշրջանային խաղին և դարձավ թիմի մեկնարկային գոլի հեղինակը։ Սա միանգամայն օրինաչափ էր՝ հաշվի առնելով, թե ինչ կարևոր դեր ուներ նա նախորդ մրցաշրջանի վերջում։
Հիշեցնենք, որ դեռ հունվարին պաշտպանը պատրաստվում էր հեռանալ ակումբից։ Ամեն ինչ փոխվեց Հանսի Ֆլիկի հետ ունեցած անձնական զրույցից հետո, որի ընթացքում մարզիչը ներկայացրեց ֆուտբոլիստի ապագա դերը թիմում և չորս տիտղոս նվաճելու հեռանկարը։
Արդյունքում Գարսիան մնաց և դարձավ ունիվերսալ խաղացող՝ օգտակար լինելով թե՛ կենտրոնական պաշտպանի, թե՛ հենակետայինի դիրքերում։ Իսկ Ժյուլ Կունդեի վնասվածքից հետո նա հիանալի դրսևորեց իրեն՝ զբաղեցնելով հիմնական աջ պաշտպանի տեղը։
Ավելի մեծ դերակատարում
SPORT-ի տեղեկություններով՝ Ֆլիկը Գարսիային հասկացրել է, որ այս մրցաշրջանում ցանկանում է բարձրացնել նրա նշանակությունը թիմի համար՝ թե՛ խաղադաշտում, թե՛ հանդերձարանում։ Մարզիչը մտադիր է նրան ավելի շատ խաղաժամանակ վստահել։
Վերջին նորությունները
Նախ, նա կլինի աջ պաշտպան Ժյուլ Կունդեի հիմնական փոխարինողը և պարբերաբար խաղաժամանակ կստանա ռոտացիայի շնորհիվ։ Բացի այդ, ըստ անհրաժեշտության, նա կկարողանա ուժեղացնել կենտրոնական պաշտպանությունը կամ հենակետային գոտին։
Այսպիսով, գալիք մրցաշրջանում Գարսիայի դերը Բարսելոնայում ավելի նկատելի կլինի, և նա, ստանալով կայուն խաղաժամանակ, կդառնա ռոտացիայի կարևոր օղակ։
Նախորդ մրցաշրջանում 24-ամյա ֆուտբոլիստը Լա Լիգայում մասնակցեց 29 հանդիպման (14-ը՝ մեկնարկային կազմում)՝ այդ ընթացքում դառնալով երկու գոլի և երեք գոլային փոխանցման հեղինակ։
Թեև նա դասական եզրային պաշտպան չէ, եզրում հաջող փոխգործակցություն էր ցուցաբերում Լամին Յամալի հետ և հուսալի էր պաշտպանությունում։ Հենց այս որակների շնորհիվ նա վաստակեց աջ պաշտպանի դիրքում առաջին փոխարինողի կարգավիճակը։
Փաստ է, որ մրցաշրջանի վերջին հինգ խաղերում նա դարձել է երկու գոլի և մեկ գոլային փոխանցման հեղինակ։ Նման ցուցանիշները վկայում են, որ նոր մրցաշրջանում պաշտպանի դերակատարումն, անկասկած, ավելի կմեծանա։
