Բարսելոնան Ֆլիկի շուրջ հստակ որոշում է կայացրել
SPORT-ի հաղորդմամբ՝ Բարսելոնան Հանսի Ֆլիկի պայմանագրի երկարաձգումը դիտարկում է որպես ակումբի գլխավոր առաջնահերթություններից մեկը։ Նպատակն է գերմանացի մարզչի հետ համաձայնագիրը երկարաձգել մինչև 2028 թվականը՝ ընդգծելով վստահությունը նրա մարզչական նախագծի նկատմամբ։
Ֆլիկը, սակայն, չի շտապում բանակցությունների հարցում։ Նրա կարծիքով՝ դեռ վաղ է խոսել նոր պայմանագրի մասին՝ հաշվի առնելով, որ նախագահական ընտրությունները դեռ չեն կայացել, իսկ իր գործող պայմանագիրը ուժի մեջ է մինչև 2027 թվականը։
Հիշեցնենք, որ Ֆլիկը 2025 թվականի մայիսին արդեն մեկ տարով երկարաձգել էր պայմանագիրը՝ ակումբի համար բարդ փուլում կայունություն ապահովելու նպատակով։
2026 թվականի հունվարին Բարսելոնան մտնում է նախագահական ընտրությունների տարի, ինչը զգալի ազդեցություն ունի ակումբում կայացվող կարևոր որոշումների վրա։ Այդուհանդերձ, ղեկավարության շրջանում կա համոզմունք, որ Ֆլիկը ճիշտ ընտրությունն է թիմը ղեկավարելու համար նաև քաղաքական փոփոխություններից հետո։
Վերջին նորությունները
Ֆլիկի գլխավորությամբ թիմը 2025 թվականն ավարտել է գերազանց մարզավիճակում՝ Լա Լիգայում հաղթական ընթացքով։ Թիմում գերիշխում են վստահությունն ու միասնականությունը, ինչը Բարսելոնային մղում է հնարավորինս շուտ գործելու։
Ակումբը մտադիր է գործող պայմանագրին ավելացնել ևս մեկ մրցաշրջան։ Նշվում է, որ կողմերի միջև արդեն եղել են ոչ պաշտոնական շփումներ, այդ թվում՝ Ֆլիկի գործակալ Պինի Զահավիի մասնակցությամբ։
Ֆլիկը լավ հարաբերություններ ունի նախագահ Ժոան Լապորտայի հետ, իսկ նախագահի հնարավոր թեկնածուների շրջանում չկա նրա գործունեության շարունակությանը դեմ դիրքորոշում։
Թեպետ այս պահին կողմերը պահպանում են համբերատար մոտեցում, ընդհանուր ուղղությունն արդեն հստակ է։
