Պաշտոնական. Բարսելոնայի փորձառու ֆուտբոլիստը վնասվածք է ստացել
Բարսելոնայի փորձառու դարպասապահ Մարկ-Անդրե տեր Շտեգենը, ով այս պահին վարձակալական հիմունքներով հանդես է գալիս Ժիրոնայում, Ռեալ Օվիեդոյի դեմ խաղում ստացել է ազդրի վնասվածք։
Ինչպես ավելի վաղ հաստատվել էր, վնասվածքը բավականին լուրջ է, և 33-ամյա գերմանացին առնվազն երեք ամիս դուրս կմնա խաղադաշտից։ Սկզբում քննարկվում էր նրա հնարավոր վերադարձը Բարսելոնա՝ վարձակալությունը վաղաժամ դադարեցնելու տարբերակով, սակայն այդ տարբերակը հետագայում բացառվել է։
Այսօր Ժիրոնան պաշտոնապես հայտարարեց, որ տեր Շտեգենը այս շաբաթ վիրահատության կենթարկվի՝ ձախ ոտքի ազդրի վնասվածքի պատճառով։
«Մարկ-Անդրե տեր Շտեգենը այս ուրբաթ վիրահատվելու է՝ Ռեալ Օվիեդոյի դեմ խաղում ստացած ձախ ոտքի ազդրի վնասվածքի հետևանքով։ Վերականգնման ժամկետները կհստակեցվեն վիրահատությունից հետո», – ասվում է ակումբի հայտարարության մեջ։
Վերջին նորությունները
Հիշեցնենք, որ տեր Շտեգենը արդեն այս մրցաշրջանում բաց էր թողել շուրջ չորս ամիս՝ մեջքի վիրահատության պատճառով, և այժմ կրկին երկար ժամանակով շարքից դուրս կմնա։
Այս իրավիճակը կարող է բացասաբար անդրադառնալ Բարսելոնայի ամառային ծրագրերի վրա, քանի որ կատալոնական ակումբը հույս ուներ մրցաշրջանի ավարտին վաճառել գերմանացի դարպասապահին՝ հաշվի առնելով նրա լավ ելույթները Ժիրոնայում և հնարավոր հետաքրքրությունը այլ ակումբների կողմից։
Վերականգնման ճշգրիտ ժամկետները հայտնի կդառնան վիրահատությունից հետո, սակայն տեր Շտեգենի մասնակցությունը առաջիկա աշխարհի առաջնությանը նույնպես հայտնվել է վտանգի տակ։
