Ներքին խնդիրներ Բարսայում. Քննարկվել է Արաուխոյի վիճակը
Catalunya Ràdio-ի LaTdT հաղորդման համաձայն՝ Բարսելոնայի մի քանի ֆուտբոլիստներ քննարկում են ունեցել՝ ուրուգվայցի պաշտպանի հոգեկան առողջության վերաբերյալ իրենց մտահոգությունների պատճառով։
Մինչ Արաուխոյի հոգեկան առողջության հետ կապված խնդիրների պատճառով անորոշ ժամանակով արձակուրդի մասին հայտարարելը, թիմում օրեր շարունակ անհանգստություն էր տիրում նրա վիճակի շուրջ։ Նրա հեռացումը Չելսիի դեմ խաղում և դրան հաջորդած իրարանցումը դարձան այս իրավիճակի արտաքին դրսևորումները, սակայն խնդիրը մի պահի հարց չէր․ այն խաղացողի ներսում կուտակվում էր արդեն շաբաթներ շարունակ։
SPORT-ի հղմամբ՝ հենց այս մտահոգությունն է, որ մի քանի խաղացողների դրդել է նախաձեռնություն ցուցաբերել և իրենց անհանգստությունները փոխանցել մարզչին։ Զրույցը սկզբում տեղի է ունեցել փոքր խմբի մասնակցությամբ, սակայն աստիճանաբար ընդլայնվել է՝ այլ ֆուտբոլիստների միանալուն զուգընթաց։ Հանդիպման ընթացքում խաղացողները հայտնել են իրենց պատրաստակամությունը աջակցելու թիմին և փոխհատուցելու Արաուխոյի բացակայությունը։
Ֆլիկի ուղերձն այս հարցում եղել է պարզ ու հստակ․ Արաուխոյին օգնելու լավագույն ճանապարհը մրցակցային բարձր մակարդակով խաղալն ու հաղթանակներ տանելն է, ինչպես նաև նրան փոխանցել այն զգացողությունը, որ կարող է լիարժեք վերականգնվել՝ առանց որևէ շտապողականության։
Վերջին նորությունները
Մարզիչի հետ հանդիպմանը մասնակցել են Կունդեն, Դե Յոնգը, Քրիստենսենը, իսկ Ժյուլ Կունդեն և Ֆրենկի Դե Յոնգը, ըստ լուրերի, առաջարկել են իրենց ծառայությունները կենտրոնական պաշտպանի դիրքում՝ անհրաժեշտության դեպքում։ Ֆլիկի արձագանքը եղել է դրական՝ նա հանգստացրել է թիմին՝ ընդգծելով, որ բազմակողմանիությունն այս Բարսայի ամենամեծ և ուժեղ կողմերից մեկն է։
Սա այն ասպեկտն է, որը գերմանացի մասնագետը հաջողությամբ կիրառում է Էրիկ Գարսիայի, Ժերար Մարտինի, Դե Յոնգի, Ռաֆինյայի, Ֆեռանի, Ֆերմինի, Օլմոյի և Լամին Յամալի նման ֆուտբոլիստների պարագայում։
Ինչ վերաբերում է կենտրոնական պաշտպանի դիրքին, ապա Ֆլիկն ունի բնական տարբերակներ՝ Կուբարսին, Էրիկ Գարսիան, Քրիստենսենը, բայց նաև այլընտրանքային լուծումներ՝ Ժերար Մարտինի կամ Կունդեի օգնությամբ, որոնք կարող են խաղալ այդ դիրքում։
Խաղացողների հետ այս զրույցը մարզիչի վրա թողել է չափազանց դրական տպավորություն, քանի որ նա տեսել է այն, ինչ համարում է հաջողության հիմնական գրավականներից մեկը՝ թիմային միասնությունը։ Տպավորություն, որը հաստատվում է նաև արդյունքներով․ Բարսան գրանցել է յոթ անընդմեջ հաղթանակ և գտնվում է արտոնյալ դիրքում Լա Լիգայի մրցաշարային աղյուսակում։
Ֆլիկի թիմը նաև զգալիորեն օգտվել է Սփոթիֆայ Կամպ Նոու մարզադաշտում անցկացրած խաղերի շարքից, իսկ գերմանացին, կարծես, վերջապես գտել է այն պաշտպանական կառուցվածքը, որը փնտրում էր Կուբարսիի, Ժերար Մարտինի և Էրիկ Գարսիայի կազմած եռանկյան մեջ։
