Օլիմպիակոսի մարզիչը կարծիք է հայտնել Բարսելոնայի ֆուտբոլիստների մասին
Օլիմպիակոսի գլխավոր մարզիչ Խոսե Լուիս Մենդիլիբարը բարձր է գնահատել Պեդրիին՝ ընդգծելով, որ նա ներկայում աշխարհի լավագույն կիսապաշտպաններից մեկն է։ Մարզիչը խոսել է նաև Բարսելոնայի և Լամին Յամալի մասին՝ ընդգծելով վերջինիս առանձնահատկությունը և պահանջելով իր խաղացողներից ցուցադրել իրենց լավագույն խաղը մրցաշարի ֆավորիտի դեմ։
Մենդիլիբարը, ով Իսպանիայում արդեն 27 անգամ մրցել է Բարսելոնայի հետ (25-ը՝ Լա Լիգայում, 2-ը՝ Արքայական գավաթում), ունեցել է ընդամենը մեկ հաղթանակ յոթ տարբեր թիմերի կազմում։
Նա համոզված է, որ իր թիմը պետք է հանդես գա իր բնորոշ ոճով. «Ես չեմ փոխելու մեր խաղաոճը։ Եթե ինչ-որ բան փոխեմ, դա այն պատճառով է, որ Բարսան քեզ ստիպում է պաշտպանվել՝ փակելով բոլոր ելքերը, ոչ թե այն պատճառով, որ ես այդպես եմ պլանավորում։ Դա մեր խաղաոճն է, և մենք այդպես էլ կմտնենք խաղադաշտ», – ասել է նա։
Նրա կարծիքով, Բարսելոնան նույնպես չի փոխում իր ոճը, և երբեմն խաղացողների բացակայությունը կարող է խաթարել թիմի մեխանիզմները. «Որոշ պահերի, երբ ստիպված ես լինում փոխարինել հիմնական խաղացողներին, կամ չես կարողանում կրկնել նախորդ կազմը, թիմը կորցնում է իր ավտոմատիզմները», – ընդգծել է Մենդիլիբարը։
Վերջին նորությունները
Խոսելով Լամին Յամալի մասին՝ մարզիչը կոչ է արել համբերատար լինել․ «Նա դեռ երեխա է։ Միայն երկու տարի է, ինչ մրցում է բարձր մակարդակում։ Այն, ինչ արեց Մեսսին, գրեթե անհնար է կրկնել, բայց Լամինը առանձնահատուկ է։ Եթե նա լավ չէ, Բարսան էլ լավ չէ։ Մենք կփորձենք լավ պաշտպանվել նրանից», – ասել է նա։
Մենդիլիբարը հավելել է, որ Բարսելոնան ունի բազմաթիվ հիանալի խաղացողներ․ «Արաուխոն վերջին խաղում դուրս եկավ և խփեց գոլ։ Դու պետք է կատարյալ լինես, որպեսզի հաղթես նման թիմի»։ Նա իր ֆուտբոլիստներից պահանջել է առավելագույն ոգևորություն՝ խաղալու մի մարզադաշտում, որտեղ «շատ դժվար է հաղթել»։
Բարսելոնայի վնասվածքներով լի կազմը նրան չի մխիթարում. «Եթե Պեդրին բացակայի, բայց խաղա Ֆրենկին, կամ եթե նա չխաղա, բայց դաշտ դուրս գա մյուսը՝ նրանք բոլորն էլ բարձր մակարդակի խաղացողներ են։ Պեդրին այնքան լավն է, որ քուլեները գրեթե մոռանում են Չավիին ու Ինիեստային։ Նա այն խաղացողն է, ով վերահսկում է խաղը, կատարում է լավագույն փոխանցումները… ամեն ինչ», – նշել է մարզիչը։
Մենդիլիբարը վստահ է, որ Բարսելոնան այս Չեմպիոնների լիգայի գլխավոր ֆավորիտներից է՝ Բավարիայի և անգլիական ակումբների հետ միասին։
Վերջում նա անդրադարձել է նաև վերջին լիգայի խաղից հետո առաջացած լարվածությանը, որն ավարտվեց Հանսի Ֆլիկի հեռացմամբ.«Վերջերս ավելի հանգիստ եմ դարձել, բայց ինձ նույնպես հեռացրել են։ Ամեն ինչ կախված է նրանից, թե ինչ ես ասում, ինչպես ես ասում և ինչպես է մրցավարը մեկնաբանում։ Համոզված եմ, որ վաղը նրան չեն հեռացնի», – ասել է Մենդիլիբարը՝ ժպիտով։
