Հանսի Ֆլիկի ասուլիսը դերբիից առաջ
Էսպանյոլի դեմ կատալոնական դերբիից առաջ Բարսելոնայի գլխավոր մարզիչ Հանսի Ֆլիկը հանդես է եկել մամուլի ասուլիսով՝ անդրադառնալով թիմի պատրաստվածությանը, կազմի հնարավոր փոփոխություններին, վնասվածք ունեցող ֆուտբոլիստների վիճակին, տրանսֆերային շուկային, ինչպես նաև դերբիի լարված մթնոլորտին։ Գերմանացի մասնագետը խոսել է Լամին Յամալի և Դանի Օլմոյի պատրաստ լինելու մասին, գնահատել մրցակցի ներկայիս վիճակը և ուղերձ հղել երկրպագուներին՝ շեշտելով հարգանքի և դրական աջակցության կարևորությունը։
Ժոան Գարսիա. «Ես նրան միշտ շատ կենտրոնացած եմ տեսնում։ Վերջին շրջանում նա բարձր մակարդակ է ցույց տվել և ապացուցել է, որ իր ձեռքբերումը ճիշտ որոշում էր։ Նա ցուցադրում է իր հսկայական որակը և մեզ համար գլխավոր դարպասապահն է։ Դա ինձ ընդհանրապես չի անհանգստացնում»։
Իր ժամանակը Բարսելոնայում. «Կարծում եմ՝ այս մեկուկես տարվա ընթացքում շատ բան եմ սովորել։ Ինձ շատ է դուր գալիս Իսպանիայում և Բարսելոնայում տիրող մտածելակերպը․ հաճույքով եմ ապրում այստեղ և աշխատում իմ շտաբի հետ, որը պարզապես հիանալի է։ Ֆուտբոլիստները անհավանական են, ակումբը մեզ աջակցում է ամեն հարցում, ինչպես նաև նախագահը։ Դեկուն և Բոյանը նույնպես․ ամբողջ մեխանիզմը կատարյալ է աշխատում։ Ես սիրում եմ լինել այս ակումբում, գիտակցում եմ՝ ինչ է այն ինձ տալիս, և միշտ կտամ իմ լավագույնը»։
Լարվածությունը դերբիում. «Ես միշտ փորձում եմ դրական մտածել։ Իմ միակ մտածմունքը վերջին հանդիպումն է, որը մենք անցկացրել ենք, բայց այս տարի ամեն ինչ կարող է այլ լինել։ Մենք բոլորս մարդիկ ենք և պետք է համակեցության մեջ լինենք հարգանքով, դա ամենակարևորն է։ Հուսով եմ՝ բոլորը իրենց համապատասխան կպահեն»։
Վերջին նորությունները
Էրիկ Գարսիա. «Վաղը կտեսնենք՝ արդյոք նա կխաղա կենտրոնական կիսապաշտպանի դիրքում։ Նա ֆանտաստիկ աշխատանք է կատարում թե՛ պաշտպանության, թե՛ կիսապաշտպանության գծում։ Կուբարսիի և Ժերարի հետ նրանք ձևավորում են շատ ամուր եռանկյունի, և այն պաշտպանական մակարդակը, որը մենք ցուցադրում ենք, շատ բարձր է։ Վաղը կկայացնենք որոշումը»։
Ցանկությունները 2026-ի համար. «Ամենակարևորն այն է, որ շարունակենք մարզվել այնպես, ինչպես վերջին երկու շաբաթներին՝ ինտենսիվությամբ, որակով, կենտրոնացվածությամբ և նվիրվածությամբ։ Այդ կերպ կարող ենք շարունակել աճել, որովհետև պոտենցիալ կա։ Իսկ ցանկությունների մասով ամենակարևորը առողջությունն է, քանի որ մենք շատ վնասվածքներ ենք ունեցել»։
Ռոնալդ Արաուխո. «Դա կախված է իրենից։ Այս պահին նա լավ վիճակում է, թեև ֆիզիկապես գուցե հարյուր տոկոսով պատրաստ չէ։ Նա պետք է որոշի, թե երբ լիարժեք կվերադառնա։ Նա խոսել է թիմակիցների հետ և բոլորի աջակցությունն ունի։ Նա վերադարձել է և մեզ համար շատ կարևոր խաղացող է։ Նա կվերցնի իրեն անհրաժեշտ ժամանակը»։
Տրանսֆերային շուկան. «Դա բարդ հարց է։ Այս պահի դրությամբ մենք պատրաստ չենք, բայց եթե վերլուծենք պաշտպանական գիծը՝ թե՛ կենտրոնական պաշտպանների, թե՛ եզրային պաշտպանների մասով, կարծում ենք՝ մեզ ևս մեկ ֆուտբոլիստ է պետք։ Ձմեռային շուկայում որակյալ խաղացող բերելը հեշտ չէ։ Սա մի բան է, որ պետք է հանգիստ քննարկել։ Վստահ եմ, որ կարող ենք ինչ-որ քայլ անել, բայց միայն այն դեպքում, եթե դա տրամաբանական լինի»։
Ուղերձը երկրպագուներին. «Այսպիսի խաղերում ամենակարևորը սեփական թիմին աջակցելն է և ոչ թե հակառակորդի դեմ գործելը։ Այդ աջակցությունն է, որ իրականում օգնում է։ Պետք է խաղացողներին փոխանցել դրական էներգիա և կենտրոնանալ քո թիմի վրա, ոչ թե մյուսի»։
Լամին Յամալ և Դանի Օլմո. «Երկուսն էլ լավ են և պատրաստ։ Դանին վերադարձել է, մասնակցել է մարզումային խաղին և վստահ տեսք ուներ մեկը մեկի դեմ իրավիճակներում։ Նա առաջընթաց է գրանցել։ Լամինն էլ վերադարձել է և հասանելի է»։
Ժոան Գարսիա. «Այս վերջին շաբաթվա ընթացքում նրա մոտ որևէ տարբերություն չեմ նկատել։ Դա հատուկ խաղ է լինելու, բայց նա լավ փուլում է, վստահ է և համոզված իր որակների ու առավելությունների վրա։ Սա լավագույն հնարավոր սցենարն է դրանք ցուցադրելու համար»։
Մրցակիցը, թեժ դերբի. «Սա բնական բան է։ Անցած մրցաշրջանը նրանց համար էլ հեշտ չէր։ Այս տարի նրանք գալիս են վստահությամբ, լավ են խաղում և գտնվում են լավ դիրքում։ Անցյալ մրցաշրջանում պայքարում էին պահպանման համար։ Մենք պետք է հանգիստ մնանք և կենտրոնանանք մեր լավագույն ֆուտբոլը խաղալու վրա, ինչպես պատրաստվել ենք։ Մենք ունենք բավականաչափ բարձր որակ հաղթելու համար»։
Ընդմիջումը. «Շնորհավոր Ամանոր։ Սա շատ հետաքրքիր խաղ է լինելու։ Շնորհավորում եմ Մանոլոյին, նա շատ լավ աշխատանք է կատարում։ Նրա թիմը շատ լավ է խաղում և հաղթել է վերջին հինգ լուրջ հանդիպումները։ Նրանք շատ լավ վիճակում են, և մենք պետք է մեծ ուշադրություն դարձնենք այս բոլոր հանգամանքներին։ Պետք է խաղանք մեր լավագույն մակարդակով»։
Աղբյուր՝ AS
