Թուրքական գրանդը հետաքրքրված է Բարսայի հարձակվողի ծառայություններով
Լեհ հարձակվող Ռոբերտ Լևանդովսկու պայմանագիրը Բարսելոնայի հետ ավարտվում է առաջիկա ամռանը, և մի շարք ակումբներ ուշադիր հետևում են նրան։
Ըստ Sport-ի՝ Լևանդովսկին, ով Բալայդոսում Սելտայի դեմ խաղում կրկին ապացուցեց, որ դեռ կարող է լինել Հանսի Ֆլիկի թիմի հիմնական հարձակվողը, այժմ մի իրավիճակում է, երբ նրա ապագան Կատալոնիայում հստակ չէ։ Բացի Միլանի հետաքրքրությունից, ի հայտ է եկել ևս մեկ պոտենցիալ հետաքրքրված կողմ՝ թուրքական Ֆեներբահչեն։ Ըստ թուրք լրագրող Սերջան Համզաողլուի, ստամբուլյան ակումբը մտադիր է փորձել ձեռք բերել Լևանդովսկուն արդեն հունվարին՝ օգտվելով ձմեռային տրանսֆերային պատուհանից։
Չնայած Լևանդովսկին վերջերս նշել է, որ այս պահին չի մտածում իր ապագայի մասին, ֆուտբոլային աշխարհը չի սպասում․ մի շարք թիմեր արդեն քայլեր են ձեռնարկում՝ նրան իրենց կազմում տեսնելու համար։ Լեհ հարձակվողը նախընտրում է մնալ Եվրոպայում և, ըստ ամենայնի, չի ցանկանում տեղափոխվել արտասովոր ուղղություններ, նույնիսկ եթե Բարսելոնան չթարմացնի նրա պայմանագիրը։ Նա չի բացառում նաև կարիերան Կատալոնիայում ավարտելու տարբերակը։
Ըստ Համզաողլուի տեղեկությունների՝ Ֆեներբահչեն պատրաստ է Լևանդովսկուն առաջարկել 18 ամսյա պայմանագիր՝ 2026-ի հունվարից մինչև 2027-ի հունիս։ Գործարքը ֆինանսավորելու համար թուրքական ակումբը կարող է վաճառել Յուսեֆ էն-Նեսիրիին, ով հավանական է, որ տեղափոխվի Սաուդյան Արաբիա։ Սակայն, ինչպես նշում է լրագրողը, առայժմ բոլոր շփումները եղել են ոչ պաշտոնական մակարդակով՝ թիմի մթնոլորտը չխաթարելու նպատակով։
Վերջին նորությունները
Եթե հունվարին պաշտոնական առաջարկ ստացվի, ապա որոշումը կախված կլինի Բարսելոնայի ղեկավարությունից։ Ակումբը պետք է որոշի՝ արդյոք կթողնի իր գլխավոր գոլահարին և ինչ գնով, քանի որ ֆինանսական սահմանափակումները կարող են խոչընդոտել նրա փոխարինողին ձեռք բերելու գործընթացը։ Լևանդովսկին մնում է թիմի ամենաարդյունավետ հարձակվողը վերջին երեք մրցաշրջաններում։
Ամռանը իրավիճակը կարող է փոխվել․ Լևանդովսկին 2026-ի հունվարի 1-ից արդեն իրավունք կունենա ազատորեն բանակցել ցանկացած ակումբի հետ՝ հաջորդ մրցաշրջանից միանալու համար։
