Ռաֆինյա. «Մենք միշտ պատրաստ ենք»
Բարսելոնայի վինգեր Ռաֆինյան կրկին ապացուցեց, թե ինչու է մնում Հանսի Ֆլիկի թիմի առանցքային ֆուտբոլիստներից մեկը։ Բրազիլացին փայլեց Իսպանիայի Սուպերգավաթի կիսաեզրափակչում Աթլետիկ Բիլբաոյի դեմ խաղում՝ նպաստելով կատալոնացիների վստահ՝ 5-0 հաշվով հաղթանակին։
Այս արդյունքը ոչ միայն ապահովեց Բարսելոնայի տեղը եզրափակչում, այլև ցույց տվեց թիմի աճող վստահությունն ու խաղային հստակությունը Ֆլիկի գլխավորությամբ։
Խաղից հետո Ռաֆինյան ընդգծեց, որ հաշիվը լիովին չի արտացոլում խաղի բարդությունը․ «Երբ մենք ճիշտ ենք խաղում՝ թե՛ պաշտպանությունում, թե՛ հարձակման գծում, խաղը դառնում է ավելի հեշտ։ Բայց դա չի նշանակում, որ խաղը հեշտ է, քանի որ Աթլետիկի դեմ խաղալը միշտ շատ դժվար է։ Նրանք որակյալ թիմ են, և ունեն ֆուտբոլիստներ, որոնք կարող են վճռել խաղի ելքը։ Մենք ենք որոշում՝ խաղը հեշտ կլինի, թե բարդ»,– ասել է նա Mundo Deportivo-ին։
Թիմի խորությունը՝ որպես առավելություն
Վերջին նորությունները
Ռաֆինյան նաև առանձնահատուկ ուշադրություն դարձրեց թիմի կազմի խորությանը, ինչը Ֆլիկը հաճախ է շեշտում իր աշխատանքում։ Նա նշեց, որ կարևոր է ոչ միայն իր գոլերը, այլ նաև այն, թե ինչպես են մյուս ֆուտբոլիստները օգտվում իրենց հնարավորություններից. «Ով էլ խաղա, մենք միշտ պատրաստ ենք և միշտ տալիս ենք առավելագույնը»։
Բրազիլացին առանձնացրեց նաև որոշ խաղացողների վերադարձը լավ մարզավիճակի․ «Ռունին շատ լավ է ներգրավվել, Ֆերմինն էլ վերադարձել է շատ լավ վիճակի։ Սա ևս մեկ անգամ ցույց է տալիս թիմի որակը»։
Ռաֆինյան հավելեց, որ ներթիմային մրցակցությունը իրեն միայն առաջ է մղում․ «Միշտ փորձելու եմ հասնել իմ լավագույն մակարդակին և ունենալ, եթե ոչ կատարյալ, ապա գրեթե կատարյալ մրցաշրջան»։
Եզրափակիչը՝ առանց նախընտրության
Այժմ Բարսելոնայի ուշադրությունը կենտրոնացած է Սուպերգավաթի եզրափակչի վրա, որտեղ մրցակիցը կլինի Ռեալ Մադրիդը կամ Ատլետիկո Մադրիդը։ Ռաֆինյան հրաժարվեց որևէ նախընտրություն ցուցաբերել։
«Մենք պատրաստ ենք նրան, ով էլ դուրս գա մեր դեմ»,– ասաց նա՝ ընդգծելով թիմի վստահ ու հանգիստ մոտեցումը։
Վերջում նա վստահեցրեց, որ թիմում կա հաղթելու համար անհրաժեշտ ամեն ինչ․ «Այս մտածելակերպով մենք ունենք ամեն ինչ՝ հաղթելու համար»։
