«Նրանք վախեցած են». Գավին խոսել է Ռեալի մասին
Նախորդ մրցաշրջանը կատարյալ չէր Գավիի համար. վնասվածքի պատճառով նա մի քանի ամիս բաց թողեց։ Սակայն այժմ, վերականգնման փուլը հաղթահարած, 19-ամյա Լա Մասիայի սանը ցանկանում է ամրապնդել իր տեղը Բարսելոնայի մեկնարկային կազմում։ Հարավային Կորեայից՝ AS-ին տված հարցազրույցում, Գավին խոսել է մի շարք կարևոր թեմաների շուրջ՝ ֆիզիկական վիճակից մինչև ավագություն, Լամինից մինչև Ռեալ Մադրիդի դեմ ուղերձը։
Ֆիզիկական և հոգեբանական վիճակ
«Իմ ինքնազգացողությունը գնալով ավելի լավ է։ Նախորդ մրցաշրջանի վերջում արդեն լավ վիճակում էի, ու այս մրցաշրջանում ցանկանում եմ ամեն ինչ տալ թիմի համար։ Դա է իմ նպատակը»։
Աջակցությունը Մարկ Բերնալին
Գավին նշել է, որ օգնել է Մարկ Բերնալին՝ վնասվածքի հաղթահարման հարցում․
«Երբ նման վնասվածք ես ունենում, մեծ նշանակություն ունի, որ մեկը, ով արդեն անցել է այդ ճանապարհով, աջակցի։ Երբ ինձ հետ պատահեց, շատ հարցեր էի տալիս Օրիոլ Ռոմեուին։ Հիմա էլ Բերնալն էր հարցեր տալիս ինձ, և ես փորձեցի նրան տալ ամենալավ խորհուրդները»։
Վերջին նորությունները
Մրցակցություն կիսապաշտպանությունում
«Մենք աշխարհի լավագույն կիսապաշտպաններից որոշներին ունենք։ Ես տարբեր դիրքերում կարող եմ խաղալ, ինչը շատ բան է ասում իմ մասին։ Մրցակցությունն ուժեղ է, բայց ինձ դուր է գալիս այդ ճնշումը»։
Ֆլիկի մարզման տակ խաղալը
«Ֆլիկի համակարգում ինձ դուր է գալիս խաղալ խորը դիրքում (վեց համարի տեղում), որովհետև այդպես ավելի շատ եմ գնդակին մոտ լինում։ Ինձ համար շատ կարևոր է խաղի մեջ առաջնային դառնալը»։
Ավագության նշանակությունը
Սեուլի դեմ խաղում Գավին կրել էր ավագի թևկապը՝ նաև գոլի հեղինակ դառնալով․
«Միշտ երազել եմ Բարսելոնայի ավագի թևկապ կրել։ Դա հպարտության առիթ է ինձ համար։ Եթե այս տարի դեռ չլինեմ ավագներից մեկը, նորմալ է։ Երիտասարդ եմ, դեռ սովորելու շատ բան ունեմ։ Կգա այդ ժամանակը»։
Տեր Շտեգենի ավագության հարցը
«Դեռ հստակ ոչինչ չգիտեմ։ Կարծում եմ՝ որոշումը կկայացնենք, երբ վերադառնանք Բարսելոնա»։
Նորեկները՝ Ռեշֆորդ, Ռունի Բարդղի, Խոան Գարսիա
«Բոլորն էլ շատ բան կարող են տալ։ Ռեշֆորդը տպավորիչ խաղացող է, Ռունին էլ լավ է հանդես գալիս։ Հուսով եմ՝ նրանք կտան լավագույնը»։
Նիկո Ուիլյամսի տեղափոխության ձախողման մասին
«Բոլորը գիտեն, որ Նիկոն հիանալի խաղացող է, և նա դա ապացուցել է հավաքականում։ Բայց մենք երջանիկ ենք Ռեշֆորդի ժամանումով»։
Լամին Յամալի մասին՝ ապագա «Ոսկե գնդակի» հավակնորդ
«Հույս ունեմ՝ նա կհաղթի։ Եթե ոչ այս տարի, ապա հետո հաստատ։ Նա բացառիկ խաղացող է, ամեն օր զարգանում է, և ֆենոմենալ է մարզումներում։ Ունի ճիշտ մտածելակերպ»։
Հարաբերությունները Ֆլիկի հետ
«Նա միշտ ինձ վստահել է։ Հետաքրքրվում է իմ վիճակով։ Դա ինձ շատ է ոգեշնչում։ Հուսով եմ՝ երկար կմնա Բարսելոնայում, որովհետև բոլորս շատ ենք գնահատում նրան»։
Ռեալ Մադրիդին ուղերձ
Լրատվամիջոցը հարցրել է, արդյոք Ռեալ Մադրիդի այս ամառվա տրանսֆերային ակտիվությունը կապված է Բարսելոնայից 4 պարտություն կրելու հետ․
«Իհարկե, նրանք վախեցած են։ 4 խաղ, 4 պարտություն։ Դա երբեք չէր պատահել։ Մենք փայլուն մրցաշրջան անցկացրինք, իսկ նրանք ոչինչ չհաղթեցին։ Այո, նրանք ուժեղացրել են կազմը, բայց մենք պետք է մնանք մենք»։
Թիմի նպատակը
«Բոլորն էլ հիշում են Չեմպիոնների լիգան։ Դա ամենակարևոր մրցաշարն է, և հուսով եմ՝ կկարողանանք հասնել եզրափակիչ։ Ես հավատում եմ թիմին»։
Դրո-ի (Պեդրո Էրնանդեսի) մասին
«Դրոն հիանալի տաղանդ է։ Նա շատ լավ մարդ է։ Ես նրան շատ խորհուրդներ եմ տալիս՝ որպես իմ ընկեր։ Հուսով եմ՝ այդ մտածելակերպով կշարունակի, ու ամեն ինչ լավ կլինի նրա համար»։
Գավին այս անկեղծ հարցազրույցում հստակ ընդգծեց ինչպես իր պատրաստակամությունը նոր մրցաշրջանին, այնպես էլ իր հասունացած դիրքորոշումը թիմի ներսում։ Նա վստահություն է ցուցաբերում թե՛ իր ֆիզիկական պատրաստվածության, թե՛ խաղային բազմակողմանիության հարցում։
Մինչ նորեկների շուրջ բարձրացող սպասելիքներն ու Տեր Շտեգենի ավագության շուրջ առկա անորոշությունները քննարկման առարկա են մնում, Գավին վստահություն է ներշնչում իր սառը, բայց նպատակաուղղված մեկնաբանություններով։
