Բարսելոնան ընդդեմ Շտեգենի
Բարսելոնայի և Մարկ-Անդրե Տեր Շտեգենի միջև լարվածությունը նոր փուլ է մտել այն բանից հետո, երբ գերմանացի դարպասապահը հայտարարեց, որ վիրահատվելու է և կվերադառնա խաղադաշտ երեք ամսվա ընթացքում։
Այդ ժամկետը, սակայն, տարաձայնությունների պատճառ է դարձել, քանի որ միայն այն դեպքում, երբ խաղացողը բացակայում է առնվազն չորս ամիս, ակումբը կարող է օգտագործել նրա աշխատավարձի 80 տոկոսը ֆինանսական հաշվարկներում։
Բարսելոնայի ճամբարում համոզված են՝ Տեր Շտեգենի ապաքինումը կտևի ավելի երկար, ինչը հաստատել է նաև վնասվածքաբանության մասնագետ դոկտոր Ռիպոլը՝ խոսելով Cadena SER-ի հետ։
«Երեք ամիսը չափազանց կարճ ժամկետ է, և թղթի վրա չորս ամիսն ավելի իրատեսական է», — նշել է մասնագետը։
Վերջին նորությունները
Նա նաև ընդգծել է, որ ոչ մի հստակություն չկա կատարվելիք վիրահատության բնույթի վերաբերյալ․
«Ամեն ինչ կախված կլինի այն բանից՝ բժիշկները կընտրեն ագրեսիվ միջամտությո՞ւն, թե՞ միայն մեղմացնող բուժում»։
Բացի այդ, Ռիպոլը քննադատել է Տեր Շտեգենի քայլը՝ նախապես հայտարարել ապաքինման ժամկետի մասին՝ վիրահատությունից առաջ․
«Ֆուտբոլիստն իրեն շատ հարմար դիրքում է դրել՝ նշելով ժամկետ՝ մինչ վիրահատությունը։ Լավագույնը կլիներ լռել և վիրահատությունից հետո ներկայացնել բժշկական եզրակացություն», — ասել է նա։
Մասնագետը հավելել է, որ Լա Լիգայի հանձնաժողովն էլ պետք է իր հերթին հետազոտություն կատարի՝ պարզելու համար դարպասապահի բացակայության ճշգրիտ տևողությունը։
Ըստ վերջին տեղեկությունների՝ Տեր Շտեգենը վիրահատվելու է երեքշաբթի, հուլիսի 29-ին։
