Ռեալը հեղափոխական քայլի է գնում
Ֆլորենտինո Պերեսը պատրաստվում է ներկայացնել նոր ծրագիր, որը արմատականորեն կփոխի ակումբի կառավարման կառուցվածքը։ Առաջարկը կքննարկվի նոյեմբերին կայանալիք ժողովի ընթացքում։
Պլանի համաձայն՝ ակումբի անդամները (socio) կպահպանեն ակումբի բաժնետոմսերի ավելի քան 50 տոկոսը, իսկ մնացած մինչև 49 տոկոսը հնարավորություն կտրվի ձեռք բերել ընկերություններին կամ հիմնադրամներին։
Այս մոդելը հիշեցնում է գերմանական Բավարիա Մյունխենի համակարգը, որտեղ մասնավոր ներդրումները համակցվում են երկրպագուների մասնակցությամբ կառավարման հետ։
Փոփոխության հիմնական նպատակը ակումբի ֆինանսական կայունությունն է՝ առանց վերահսկողությունը կորցնելու։ Նախաձեռնության հեղինակների խոսքով՝ սա թույլ կտա ամրապնդել Ռեալ Մադրիդի տնտեսական հիմքերը, պաշտպանել նրա ակտիվները և միաժամանակ անդամներին տալ իրական բաժնեմասեր, ինչը նրանց ավելի պատասխանատու և զգոն կդարձնի ակումբի շահերի պաշտպանության հարցում։
Վերջին նորությունները
Նոր համակարգի դեպքում որոշումները կընդունվեն հատուկ խորհրդի կողմից, որի կազմում կլինեն և՛ անդամների, և՛ ներդրող ընկերությունների ներկայացուցիչները։ Սա կարող է ապահովել հավասարակշռություն՝ պահպանելով Ռեալի ավանդական ինքնությունը, բայց նաև ապահովելով ժամանակակից կառավարման մոտեցումներ։
Ակնկալվում է, որ Բարսելոնան ևս մոտ ապագայում կարող է անցում կատարել նման մոդելի, հատկապես եթե Ռեալ Մադրիդն այն իրականացնի, և արդյունքները դրական լինեն։
