Հայտնի է՝ ով կարող է փոխարինել Հանսի Ֆլիկին
Մինչ հավերժ մրցակից Ռեալ Մադրիդում մարզչական հարցում շարունակվում են փոփոխություններն ու ընդհանուր անկայունությունը, Բարսելոնան վայելում է հարաբերական հանգստություն։ Դրա գլխավոր պատճառը Հանսի Ֆլիկի նկատմամբ բարձր վստահությունն ու աջակցությունն է, որն առկա է թե՛ երկրպագուների, թե՛ ակումբի ղեկավարության շրջանում։
Գերմանացի մասնագետը Բարսելոնայի հետ պայմանագիր ունի մինչև 2027 թվականը։ Թեև հետագա երկարաձգումը չի բացառվում, Ֆլիկը նախընտրում է չշտապել և շարժվել փուլային մոտեցմամբ։
Սակայն կատալոնական ակումբը չի ցանկանում անակնկալի գալ և արդեն հիմա ուսումնասիրում է հնարավոր տարբերակներ՝ Ֆլիկի հեռանալու սցենարի համար։ Այդ մասին հայտնում է Diario SPORT-ը։
Լուիս Էնրիկեն՝ գլխավոր թեկնածու
Ակումբի ցանկում առաջին տեղում է Լուիս Էնրիկեն, ով շարունակում է մեծ հեղինակություն վայելել կապտանռնագույնների երկրպագուների շրջանում։ Նա նախկինում արդեն գլխավորել է կատալոնական թիմը և լավ ծանոթ է ակումբի ներքին մշակույթին ու խաղային փիլիսոփայությանը։
Վերջին նորությունները
Վերջերս Էնրիկեն պատմական հաջողության հասավ՝ ՊՍԺ-ին առաջնորդելով դեպի ակումբի առաջին Չեմպիոնների լիգայի գավաթն ու մրցաշրջանի թրեբլը։ Սակայն աղբյուրի համաձայն՝ իսպանացի մասնագետը չի ծրագրում երկար մնալ Փարիզում, ինչը կարող է բացել ճանապարհ նրա հնարավոր վերադարձի համար Կամպ Նոու 2027 թվականին։
Արտետան՝ որպես այլընտրանքային տարբերակ
Ֆլիկի հնարավոր փոխարինողների թվում է նաև Արսենալի գլխավոր մարզիչ Միկել Արտետան։ Վերջին տարիներին նա համարվում է աշխարհի ամենապահանջված ու բարձր գնահատվող մարզիչներից՝ կառուցելով մրցունակ ու կայուն նախագիծ լոնդոնյան ակումբում։
Արտետայի՝ Բարսելոնայի հետ ունեցած անցյալը նրան դարձնում է բնական թեկնածու կատալոնական թիմի համար։ Իսպանացի մասնագետը Արսենալը ղեկավարում է 2019 թվականից և հնարավոր է, որ մոտ ապագայում ցանկանա նոր մարտահրավեր։
Եթե Արտետային հաջողվի այս մրցաշրջանում թիմին հասցնել Պրեմիեր լիգայի չեմպիոնությանը, նրա հեղինակությունը կարող է զգալիորեն բարձրանալ՝ գրավելով եվրոպական մի շարք գրանդ ակումբների ուշադրությունը, այդ թվում՝ Մանչեսթեր Սիթիի, Բավարիայի և նույնիսկ Ռեալ Մադրիդի։
