Հանսի Ֆլիկի կոշտ քննադատությունը Բարսելոնայի խաղացողների հասցեին
Բարսելոնան Լա Լիգայի նոր մրցաշրջանը մեկնարկեց հաղթական՝ 3-0 հաշվով առավելության հասնելով Մայորկայի նկատմամբ։ Թեև արդյունքը թվացյալ լավն էր, սակայն գլխավոր մարզիչ Հանսի Ֆլիկի համար թիմի խաղը հեռու էր բավարար լինելուց։
Հետխաղյա ասուլիսում գերմանացի մասնագետը արդեն ակնարկել էր, որ դժգոհ է թիմի կատարողականից, հատկապես այն պահից, երբ մրցակցին երկու կարմիր քարտ տրվեց, իսկ Բարսան կորցրեց խաղային կարգապահությունը։
Իսպանական SPORT-ի տեղեկացմամբ՝ Ֆլիկը հանդերձարանում պայթել է զայրույթից՝ հայտարարելով, որ նման մակարդակով թիմը նույնիսկ չի կարողանա նվաճել Լա Լիգան։
Ֆլիկը հստակ ուղերձ է հղել իր խաղացողներին․ նա շեշտել է, որ միայն անուններով և տեխնիկական որակներով հնարավոր չէ հաջողության հասնել։ Նրա պահանջը մեկն էր՝ ինտենսիվություն, կենտրոնացում և ֆիզիկական սրություն։ Առանց այս բաղադրիչների, ըստ մարզչի, Բարսելոնան չի կարող մրցել եվրոպական գրանդների հետ։
Վերջին նորությունները
Ֆլիկը նույնիսկ համեմատություն է անցկացրել Բավարիայի հետ․ սեքսթապլ նվաճելուց հետո մյունխենյան թիմը կորցրեց քաղցը և հաջորդ մրցաշրջանում սահմանափակվեց միայն Բունդեսլիգայով։
Գերմանացի մասնագետը նաև ընդգծել է, որ առաջնության ելքը կարող է որոշվել հենց առաջին փուլերում, ուստի Բարսելոնան չի կարող իրեն թույլ տալ անտեղի միավորներ կորցնել։
Միաժամանակ Ֆլիկը հստակեցրել է, որ անհրաժեշտության դեպքում պատրաստ է արմատական փոփոխությունների։ Նա արդեն ցույց է տվել իր վճռականությունը՝ անսպասելիորեն աջակողմյան պաշտպանությունը Էրիկ Գարսիային վստահելով Մայորկայի դեմ խաղում։
Չնայած կոշտ քննադատությանը, Ֆլիկը շարունակում է հավատալ իր թիմին․ ըստ նրա՝ Բարսելոնան կարող է ամեն ինչ նվաճել, եթե խաղա իր հնարավորությունների 100%-ով։
